Ingimar Guðmundsson er menntaður tómstunda- og félagsmálafræðingur og hefur yfirumsjón með allri starfsemi Bungubrekku. Áður en Ingimar kom inn í starf Bungubrekku 2020 starfaði Ingimar sem teymisstjóri í hegðunar- og atferlisteymi í alþjóðlegum enskuskóla í Svíþjóð. 

Símanúmer: 660-3919

Póstfang: Ingimar@hvg.is

Liljar Mar Pétursson er menntaður mannfræðingur og starfar sem frístundaleiðbeinandi í Bungubrekku sem hann hefur gert síðan 2020. Liljar starfar þvert á starfið og tekur þátt í öllu því fjölbreytta starfi sem Bungubrekka býður upp á með einum eða öðrum hætti. Liljar tekur einnig þátt í margvíslegri skipulagsvinnu og vinnur fjölbreytt verkefni sem bæta þjónustu Bungubrekku. 

Karen Björk Sigríðardóttir er í fjarnámi í sálfræði við Háskólann á Akureyri samhliða því að starfa í Bungubrekku. Karen Björk kom inn í starfið 2020 með mikinn metnað og hefur síðan þá gert allt til þess að starfið standist kröfur og væntingar. Ásamt því að vera einstaklega næm á hegðun og líðan barna er hún er einnig mjög skapandi og sér til þess að starfið sé fjölbreytt fyrir fjölbreyttan hóp. Karen Björk starfar að mestu leyti í frístundaheimilinu en tengist samt sem áður inn í heildarstarfsemi Bungubrekku og hefur starfað á sumarnámskeiðum og í félagsmiðstöðinni.

Kristófer Atli Kárason hefur starfað í Bungubrekku frá stofnun Bungubrekku árið 2018 og hefur verið lykilmaður í því að þróa starfið. Kristófer var einnig hluti af starfsteymi frístundaheimilisins áður en það varð hluti af frístundamiðstöðinni. Hann hefur góða yfirsýn á starfið og veit manna best hvað virkar og hvað ekki. Kristófer er skipulagður, kröfuharður á sjálfan sig og tekur öllum verkefnum fagnandi. Kristófer sér um að skipuleggja daglegt starf í frístundaheimilinu en tekur einnig þátt í margs konar breytilegum verkefnum innan Bungubrekku. 

Vilhjálmur Snær er tómstunda- og félagsmálafræðingur og kom inn í starf Bungubrekku vorið 2023. Vilhjálmur kemur til okkar með margra ára reynslu úr félagsmiðstöðvastarfi í Reykjavík. Vilhjálmur hefur yfirumsjón með rafíþróttastarfi Bungubrekku. Hann vinnur líka þvert á starf Bungubrekku og tekur þátt í öllu frístundastarfi ásamt því að taka virkan þátt í mótun starfsins og skipulagi. Vilhjálmur er lausnarmiðaður, jákvæður og lyftir starfinu upp í hvert skipti sem hann mætir á staðinn.

Elías Breki Sigurbjörnsson hóf störf í Bungubrekku 2020 og sér um daglegt skipulag í félagsmiðstöðinni Skjálftaskjól og er lykilstarfsmaður í skipulagningu viðburða sem tengjast starfi Skjálftaskjóls. Hann var í stjórn félagsins Trans Ísland í 2 ár ásamt því að vera í hlutastarfi í hinsegin félagsmiðstöðinni í Reykjavík. Ef Bungubrekka er að skipuleggja viðburð þá eru líkur á því að Elías sé sá starfsmaður sem er með yfirumsjón á því. Ásamt því að sinna öllum þessum störfum þá starfar hann einnig í frístundarheimilinu í daglegu starfi. 

Herbert Elvan Heiðarsson vann sem bifvélavirki áður en hann hóf störf í Bungubrekku árið 2020. Herbert er einstaklega jákvæður og tekur frumkvæði í öllum verkefnum sem tengjast Bungubrekku. Herbert starfar að mestu leyti í frístundaheimilinu en ásamt því hefur hann starfað á sumarnámskeiðum Bungubrekku. Herbert hefur ákveðna yfirumsjón með búnað sem frístundamiðstöðin á og tryggir að aðgengi að honum sé gott. Herbert gerir allt fyrir starfið og börnin sem gerir það að verkum að reglulega heyrist í börnunum “Hey pabbi, nei ég meina Hebbi”. 

Kolbrún er félagsliði en hóf upphaflega störf sem matráður í Bungubrekku. Hún kom inn í starfið 2022 í nýtt tilraunar hlutverk í tímabundinn tíma enda ekki algengt að frístundamiðstöð sé með matráð. Kolbrún leysti nýja hlutverkið það vel að ákveðið var að halda því áfram í starfinu og þróa hlutverk matráðs enn frekar. Kolbrún færðist í nýtt hlutverk í ágúst 2022 þar sem hennar menntun myndi nýtast betur, en hún einblínir sérstaklega á að veita börnum stuðning sem á honum þurfa að halda í frístundaheimilinu. 

Gunnhildur hefur starfað með einum eða öðrum hætti í Bungubrekku frá árinu 2022. Gunnhildur hefur að mestu leyti tekið þátt í starfi og undirbúningi á sumarnámskeiðum ásamt því að vera í afleysingum í frístundarheimilinu og félagsmiðstöðinni. Frá fyrsta degi hefur Gunnhildur komið með ferskan blæ og nýjungar inn í starfið, börnum og unglingum til mikillar gleði. Gunnhildur er með meistaragráðu í listkennslu frá Listaháskóla Íslands ásamt keramikgráðu. Þekking og reynsla Gunnhildar er einsdæmi í starfi Bungbrekku og bætir gæði starfsins á alla vegu.

Færðist yfir í afleysingar haust 2023

Dagný Rún Gísladóttir starfar í félagsmiðstöðinni Skjálftaskjól og hefur gert það frá árinu 2018. Dagný hefur því starfað lengst af öllu núverandi starfsfólki Bungubrekku í félagsmiðstöðinni sem gerir hana einstaklega mikilvæga í fagþróun starfsins. Dagný var ein af stofnendum  meistaraflokks kvenna í knattspyrnu Hamars sem leikmaður og fyrirliði sem segir margt um drifkraftinn sem fylgir henni. Hún starfar einnig sem stuðningsfulltrúi í Grunnskólanum í Hveragerði og er mikilvægur tengiliður milli skólans og félagsmiðstöðvarinnar. 

Færðist yfir í afleysingar haust 2023

Stella kom fyrst inn í starf Bungubrekku sumarið 2021 þegar hún tók þátt í fjölbreyttum sumarnámskeiðum það sumarið. Tveimur árum seinna hóf Stella aftur störf í Bungubrekku í 100% starfshlutfalli. Stella er mikilvægur hlekkur í fjölbreyttri skipulagsvinnu starfsins og því sem gerist “bakvið tjöldin”. Stella er með fjölbreytta reynslu sem nýtist í starfinu, bæði úr frístundastarfi en einnig úr háskólanámi í lífefna- og sameindarlíffræði og ljósmyndun. Stella getur tekið að sér öll heimsins hlutverk í starfi Bungubrekku og leyst þau, hvort sem það er í frístund, félagsmiðstöðinni, á námskeiðum eða á viðburðum

Færðist yfir í afleysingar vor 2023

Elva Björk Jónsdóttir er útskrifuð sem einkaþjálfari frá Keili og starfar sem Frístundaleiðbeinandi í Bungubrekku. Elva flutti til Hveragerðis árið 2020 og hefur unnið í Bungubrekku síðan. Elva tekur þátt í öllu því fjölbreytta starfi sem Bungubrekka hefur upp á að bjóða. Meðal annars skipulagi á viðburðum og daglegu starfi tengdu frístundaheimilinu, sumarnámskeiðum og félagsmiðstöðinni. Elva er einstaklega sterk í því að skipuleggja og halda utan um stóra viðburði og tekur nánast alltaf þátt í stórum verkefnum sem tengjast Bungubrekku. 

Færðist yfir í afleysingar haust 2022

Karen Elva Jónsdóttir hefur starfað í Bungubrekku síðastliðin ár og tekið þátt í flest öllu frístundastarfi sem Bungubrekku býður upp á. Karen Elva er í námsleyfi þar sem hún er að klára meistaragráðu í félagsráðgjöf. Karen Elva er mamma hópsins og heldur starfsmannahópnum vel saman. Samhliða náminu mun hún starfa að einhverju leyti og koma eins mikið inn í starf Bungubrekku og hún hefur tök á, sem verður ómetanlegt fyrir starfið allt.